Chasa da vacanzas

Il chomp da vacanzas spordscha plazza a ca. 40 persunas e's preschainta seguaintamaing: Entrada dal süd sül plan terrain cun la chadafö*, chaminada, local da gardaroba per s charpas e büschmainta, local per skis e da deposit, locals da's lavar, tualettas, local da süantar e plazza da giovar our i'l liber cun üna platta da pingpong. Entrada dal nord sül plan terrain cun la sala gronda (fin 60 plazzas da tschantar), fussballin, ascensur da cuschina, sala pitschna (ca. 30 plazzas da tschantar), gronda terrassa, tract da durmir sül 1. plan sura cun trais chantunamaints, üna chombra singula, üna chombra dubla sco eir installaziuns sanitarias. Tract da durmir sül 2. plan sura cun duos chantunamaints e duos chombras dublas sco eir installaziuns sanitarias.

*La chadafö es drizzada aint bain per preparar pasts per fin a 60 persunas.
 

Predschs directivs per gruppas pro persuna e pernottaziun, a partir da quatter dis.

Il consüm da forza electrica, ils cuosts supplementars, la nettionda finala, la taxa da cura e'l telefon vegnan miss in quint separadamaing.

Ch'Ellas/Els as mettan per plaschair in contact cun nus per dumondas da reservaziun cul formular d'indreschimaint qua suotvart.

Anna Margaritta Filli s'ingascha daspö bod 50 ons cun gronda paschiun per la Chasa Fliana a Lavin. Seis ons d'actività sun stats influenzats da gronds müdamaints. Ad ella es quai reuschi dürant tuot quists ons fich bain da manar la gestiun tras quist temp. Ils mumaints decisivs da seis temp d'actività da blers ons sun stattas las müdadas, las cumplettaziuns e'ls ingrondimaints da la chasa, la reorganisaziun da la società e la constituziun da la fundaziun.
Anna Margaritta es in cas da fuormar cun success fin al di d'hoz, cun sia persunalità e sias cugnuschentschas professiunalas, il svilup ulteriur da la "Scoula da Paurs Chasa Fliana" chi'd es gnüda fundada da ravarenda Rico Parli. Seis sustegn per quist proget, ed a seis temp eir da seis hom Plasch, es exemplaric.
Grazcha fich per l'ingaschamaint grondius e nus tilla giavüschain amo blers ulteriurs ons da servezzan cun success e satisfacziun.
 

Il grond success da la Scoula da Paurs Lavin chi'd es gnüda fundada dal 1957 e l'augmaint da la sporta eir per las duonnas, decis dal 1960, han intimà da chattar bain svelt üna soluziun per realisar pussibiltats da scolaziun adequatas. Ils sforzs intensivs da ravarenda Rico Parli han pussibiltà cha la società nouvfundada ha pudü cumprar e fabrichar oura ün edifizi d'economia adattà. Als 22 october 1961 ha gnü lö l'inauguraziun festiva da la chasa da scoula e da vacanzas. Il nomer da partecipantas e partecipants als cuors s'ha augmantà constantamaing e quai ha manà adaquella cha la sala ha stuvü gnir ingrondida l'on 1980. Lura s'haja fat differentas adattaziuns plü grondas e plü pitschnas (chadafö nouva etc.). I'ls ons 2013/14 s'haja isolà la fatschada e'l tet e montà fanestras nouvas. Dadaintvart sun gnüts installats indrizs sanitaris moderns, quai ultra da differentas lavurs da renovaziun. Cun quista renovaziun cumplessiva vain nus amegldrà nossa sporta per bainquant. L'edifizi as rechatta uossa in ün bun stadi chi correspuonda plainamaing a las pretaisas dad hozindi. A partir da l’on 2019 es la Fundaziun Chasa Fliana respunsabla pel stabilimaint e la società Lö d’inscunter Chasa Fliana pel program cultural.

La Chasa Fliana spordscha surtuot a scoulas e gruppas pussibiltats d'allogi adattadas. Numerusas persunas profitan da nossa sporta chi contribuischa sgür e tschert eir bler al contact social cun la populaziun da nossa regiun. Il cussagl da Fundaziun e las collavuraturas e'ls collavuraturs s'allegran da pudair spordscher a noss giasts da vacanzas ün allogi modern e favuraivel.