Contact

Lavin es bain ragiundschibel cul tren. Il viadi cul tren via tunnel dal Vereina (eir transport d'autos pussibel) düra davent da Turich be var duos uras. L'urari online chattan Ellas/Els sün la pagina-web da las VFF.
Cul auto as riva a Lavin sur ils pass dal Flüela, Albula, Güglia, Malögia, Bernina o Fuorn. Eir sur l'Austria (tunnel da l'Arlberg) es la via sgüra eir d'inviern. 

La staziun da la Viafier retica es ragiundschibla a pè in trais minuts, la butia in cumün e la posta in duos minuts. Regiuns da skis a Scuol-Ftan-Sent (a Ftan eir via da schlisolar), Zuoz e Clostra, via da schlisolar e ponilift a Lavin. Loipas da passlung a Lavin, Zernez (9 km) e Scuol (16 km). A Zernez e Scuol existan pussibiltats attractivas da far bogn (bogns cuverts e Bogn Engiadina).
Destinaziuns d'excursiun multifarias da stà e d'inviern. Grondiusas pussibiltats da chaminar aint il Parc Naziunal vaschin e seis contuorns.

Sül territori da Lavin (fusiunà daspö l'on 2015 cul cumün da Zernez) sun situats ils incumparabels "Lais da Macun". Quai es üna planüra da lais cun passa vainch lais alpins plü gronds e plü pitschens. La gita otalpina pro l'unica enclava e daspö l'on 2000 part dal Parc Naziunal Svizzer es sainza congual. L'access succeda i'l cas ideal davent da Zernez sur il Munt Baselgia e la Fuorcletta da Barcli. Pels prüms 600 meters d'otezza da Zernez fin a Plan Sech (ur dal god) esa pussibel da reservar ün taxi. La regiun es populada d'üna colonia da macuns. Davo il lö signalisà per far la posa al "Lai dal Dragun" as vaja ingiò fin pro l'alp Zeznina e lura fin a Lavin.

La vicinanza cun las vals cunfinantas e'ls buns access fan da Lavin il lö ideal per excursiuns.