Istorgia dal fabricat

Il grond success da la Scoula da Paurs Lavin, fundada dal 1957, ed il schlargiamaint da la spüerta eir per duonnas, decisa dal 1960, han pretais bain svelt üna soluziun a reguard s-chaffir localitats da scolaziun adattadas. Las staintas intensivas da ravarenda Rico Parli han pussibiltà cha la società fundada nouv ha pudü cumprar ün edifizi d‘economia adattà e til ingrondir. Als 22 october 1961 ha gnü lö la festa d’inauguraziun da la chasa da scoula e da vacanzas. Il nomer da partecipantas e partecipants s’ha augmantà cuntinuadamaing da maniera cha dal 1980 ha gnü da gnir ingrondida la sala. I sun seguits plüs adattamaints plü gronds e plü pitschens (nouva chadafö etc.). Dürant ils ons 2013/14 sun gnüts isoladas las fatschadas e la tettaglia e nouvas fanestras sun gnüdas montadas. A l’intern sun gnüdas fattas, sper differentas lavurs da renovaziun, nouvas installaziuns sanitarias. Cun quista renovaziun cumplessiva vain nus megldrà nossa spüerta per bainquant. Il stabilimaint as rechatta actualmaing in ün bun stadi chi correspuonda plainamaing a las pretaisas d’hozindi.

La Chasa Fliana spordscha pustüt a scoulas e gruppas pussibiltats dad allogi adattadas. Numerusas persunas profitan da nossa spüerta chi contribuischa sgür al contact social culla populaziun da nossa regiun. La suprastanza da la società „Lö d’inscunter, Chasa Fliana, Lavin“, ed ils collavuraturs s’allegran da pudair spordscher a noss giasts da vacanzas ün allogi modern per ün predsch favuraivel.

Giubileum 50 ons scoula da paurs Lavin