Situaziun / arriv

A Lavin as riva bain cul tren o cul auto. Il viadi da tren via tunnel dal Vereina (pussibel eir da chargiar l’auto sül tren) importa davent da Turich be duos uras. Cun l‘auto as riva a Lavin sur ils pass dal Flüela, Alvra, Güglia, Malögia, Bernina o Fuorn. D’inviern es la colliaziun sgüra eir da l’Austria (tunnel da l‘Arlberg).

A la staziun da la Viafier retica as riva in trais minuts e pro la butia e la posta da cumün as riva a pè in duos minuts. Territoris da skis e loipas da passlung, Scuol-Ftan-Sent (a Ftan eir via da schlitra), Zuoz e Clostra. A Lavin eir Pony-Lift e via da schlitra. A Zernez (9 km) e Scuol (16 km) daja pussibiltats attractivas da far il bogn (bogn cuvert e Bogn Engiadina). Lö da partenza per far excursiuns multifarias d’inviern e d‘instà. Stupendas pussibiltats per far spassegiadas aint il Parc Naziunal e seis contuorns.

Sül territori da Lavin (fusiunà a partir dal 2015 cul cumün da Zernez) as rechattan ils incumparabels „Lais da Macun“. I’s tratta dad üna platta da lais cun daplü co 20 lais da muntogna plü pitschens e plü gronds. La gita alpina fin pro l’unica enclava, chi fa part daspö il 2000 dal Parc Naziunal Svizzer, es extraordinaria. Il meglder access s‘haja davent da Zernez sur il Munt Baselgia e la Fuorcletta da Barcli. Pels prüms 600 meters dad otezza davent da Zernez fin a Plan Sech (cunfin dal god) po gnir organisà, sün preavis, ün taxi. Üna colonia da capricorns viva in quist territori. Davo la plazza per far la posa (chi’d es signalisada) pro‘l „Lai dal Dragun“ segua la schmuntada sur l‘Alp Zeznina ed inavant fin a Lavin.

Lavin es ideal sco lö da partenza per excursiuns e quai grazcha a la vicinanza da las valladas cunfinantas ed al bun access.