Società

 

Cul nom „Lö d’inscunter Chasa Fliana, Lavin”, exista üna società i’l sen dals art. 60 ss. dal Cudesch civil svizzer chi nu perseguitescha böts economics.

La società ha per mera da promouver la fuormaziun professiunala e la scolaziun da creschüts in general. Ella organisescha impustüt cuors d’instrucziun e referats e spordscha implü a la populaziun ün lö per s’inscuntrar, per cultivar la cultura e la cumünanza.

Tschantamaints Fliana 2014

La società maina illa Chasa Fliana üna gestiun per colonias da vacanzas. Eir passants o gruppas pitschnas han la pussibiltà da pernottar üna o plüssas nots.

La radunanza generala ha gnü lö in mardi, 20 marz 2018, a las 20:15 h in Chasa Fliana, Lavin.

Tractandas:

  1. Bivgnaint
  2. Tscherna dombravuschs
  3. Approvar il protocol da la radunanza dals 15 marz 2017
  4. Approvar il rapport da gestiun
  5. Rendaquint 2017, rapport dal revisurat
  6. Tschernas perioda 2018 – 2021
    1. Presidenta o president
    2. Quatter commembras o commembers da la suprastanza
    3. Commembras e commembers dal cussagl (fin uossa ot commembras o commembers)
    4. Revisurat (duos revisuras o revisurs ed üna suppleanta o ün suppleant)
  7. Approvar il preventiv 2018
  8. Fixar las contribuziuns da las commembranzas 2019
  9. Preschantar il program provisoric dals cuors e referats 2018
  10. Propostas inoltradas da commembras o commembers (art. 14, alinea 4 dals tschantamaints)
  11. Varia

SOCIETÀ LÖ D’INSCUNTER CHASA FLIANA LAVIN

Rapport da gestiun 2017

Charas commembras, chars commembers, charas fauturas, chars fauturs, charas amias e chars amis da La Fliana

60 ons sun passats, daspö la fundaziun da la scoula da paurs a Lavin. No vain adattà permanentamaing la sporta als bsögns da nossa populaziun. Cumanzà ha il fundatur rav. Rico Parli, l’on 1957/58 cun ün cuors per paurs, al qual han tut part 12 interessents. Il prüm cuors per duonnas ha gnü lö l’on 1960/61, cun 45 partecipantas. Per la prüma jada vain publichà quist on ils cuors paurils insembel culs cuors generals. L’esit es stat fich positiv. Pro’ls cuors generals vain pudü registrar ca. 20% daplü annunzchas sco l’on avant.

Ils affars ordinaris ha la suprastanza reglà in duos sezzüdas. Nos böt es da sgürar il success dal Lö d’inscunter Chasa Fliana Lavin (in seguit La Fliana) a lunga vista, saja quai cun adattar nossa sporta als bsögns actuals, ma eir cun profitar da la grond’experienza da las manadras e dals manaders dals cuors. No ans vain occupats eir cun la staziun dal tren a Lavin. Cuntschaintamaing deira l’idea da spostar tala dadour cumün. Grazcha a l’iniziativa da bleras persunas interessadas, esa reuschi dad evitar quai. Eir nus ans vain partecipats vi da tal process, cun la ferma presvasiun, cha quai es a favur da La Fliana. Da la sporta dal cumün da Zernez, d’archivar las actas da societats aint il archiv cumünal, vain fat gugent adöver. La suprastanza es landervia da ramassar e registrar las actas per pudair impalmar talas al archivar cumünal. La collavuraziun cun Mia Engiadina as ha verifichada. Lur vasts contacts ans güdan a dar cuntschaint nossas sportas. Cun la fundaziun Ferienlager Teufen, vain pudü renovar la cunvegna da dret precedaint da fittar la chasa Fliana. Els sustegnan eir inavant nossa società finanzialmaing. Ulteriuras infuormaziuns che chi capita in nossa società as chatta eir sün la pagina d’internet.

Dals 24 october fin als 12 december 2017 ans vain reunits, sco üsità, mincha mardi a las 09:15 h in la sala polivalenta a Lavin. Meditaziun, referat cun discussiun, schoppa da giuotta cun desert e cafè in chasa Fliana e davomezdi lavurs in gruppas, scumaparti in differents locals in cumün, quai es stat il program dal di. Manà tras vain ils seguaints cuors generals: Lavurs da man da tuot gener cun Mengia Bonifazi, Lavin, pitturar cun culuors d’aquarelI cun Cilgia Nogler, Bever, calligrafia, differentas scritüras ed ornamaints cun Christa Pinggera, Zernez, giovar teater cun Ottilia Cavelty, Ftan, fieutrar bes-chas e fluors cun Gaby Famos, Vnà, gimnastica per as tgnair corporalmaing e mentalmaing fits cun Anny Unternährer, Scuol, sculpturas in lain cun Peter Jud, Pany, cuors da cuntinuaziun per leptop cun Duri Denoth, Sent, ed atelier da scriver cun Beat Senn, Zizers. Per pauras e paurs vain sport duos cuors d’ün di, culs temas omeopatia e valütaziun da muvel da maz.

«Zwischen Orchideen und Kakteen: Leben und Lernen in Mexiko» – referat da la predichanta Marianne Strub, Ardez; «Die Gletscher und ihr Verschwinden», referat da Caroline Fink, Turich; «Da las linguas e da la tuor da Babilonia» referat da Romedi Arquint, Chapella; “La sfida dad ün solitari: Retuorn” – il film da la novella dad Oscar Peer cun moderaziun da Chasper Pult, Paspels / Sent; “Lavur d’üna guardgia dal Parc Naziunal Svizzer, dürant las stagiuns” cun Claudio Irniger, guardian dal parc, Zernez; “Wie zeigt sich Sehbehinderung im Alter” referat da Ingrid Jansen, Cuoira / Davos; “500 ons refuormaziun” referat da ravarenda Hans-Peter Schreich, Valchava, “La schocca s-charlatta” film in memoria a Tina Cuorad, Lavin, cun moderaziun dad Isabelle Jaeger, e chant d’Advent cun Christa Pinggera. Quai es stat il program da l’avantmezdi. La frequentaziun dals cuors ed eir da las occurenzas es statta fich buna e nus pudain verrer inavo sün ün on da grond success. Grazcha fich al comitè d’organisaziun al qual fan part Annapatrizia Richert, Bos-cha, Ottilia Christoffel, Silvaplana, Mathilda Pernisch e Annastasia Parli, S-chanf, Annina Erni, Scuol, Gianna Martina Peer, Ramosch e Reto Lamprecht, Sta. Maria.

La situaziun finanziala da La Fliana as ha stabilisada. Fich allegraivel es l’augmaint dal nomer da commembras e commembers da bundant 9 %, sün 214. La buna partecipaziun als cuors e referats sco eir la bainvuglientscha da diversas persunas ed instituziuns chi han fat donaziuns generusas, han influenzà considerabelmaing il bun resultat. Las entradas cun dar a fit la chasa Fliana sun dafatta creschüdas per ca. CHF 2’000.-, quai impustüt causa l’instancabel ingaschamaint da nossa administradura Anna Margaritta Filli-Barbüda, Lavin. Grazcha fichun.

Charas commembras, chars commembers, quist on ans stan avant las reelecziuns o elecziuns dals organs da La Fliana. Eu speresch fich, cha nus chattain persunas chi sun prontas da surtour respunsabiltà per manar nossa società, la quala ha üna grond’importanza per nossa regiun.

Nos ingrazchamaint va a tuottas persunas, chi han eir quist on contribui vi da la prosperità da nossa società. Quai sun las commembras e commebers e donaturas e donatuors pel sustegn finanzial, tuottas predichantas e tuots predichants per las meditaziuns, a Christa Pinggera, Zernez, per l’accumpagnamaint musical, a Cilgia Etter, San Niclà, chi pissera per la buna schoppa, ad Anna Bonifazi, Lavin, per la lavur sco pedella da la chasa da scoula, ad hommens e duonnas chi güdan pro’l giantar ed a rumir la sala polivalenta, a las numerusas persunas chi tachan oura ils placats da nossas occurenzas in ils singuls cumüns, a las medias da massa per las publicaziuns sur da las activitats da nossa società sco eir a tuottas otras persunas, chi sustegnan in qualsia möd La Fliana.

Grazcha fichun eir als organs da nossa società, nempe al cussagl, a la suprastanza ed als revisurs da quint per la buna collavuraziun.

Scuol, marz 2018                                                                                Il president: Jachen Erni

Protocol 2016

S-chüsats: Nino Bisaz, Dumeng Duschletta, Christian Fanzun, Waltraud Hitzberger, Otto ed Annamaria Huber, Erica König, Mengia Fila Luzzi, Gion Peider Mischol, Thomas Nievergelt, Cilgia e Buolf Nogler, Verena ed Ernst Oberli, Mathilda Pernisch, Flurinda Raschèr, Aita e Jachen Zanetti.

Preschaints: 27 persunas (vair la glista da preschentscha acclusa) e nos president Jachen Erni.

Bivgnaint

Nos president Jachen Erni das-cha salüdar a 27 persunas a la radunaza generala. El manzuna cha’l Lö d’inscunter Chasa Fliana das-cha festagiar quist on il giubileum da 60 ons. Spezialmaing salüda el al fundatur e commember d’onur dal Lö d’inscunter sar Rico Parli.

Tscherna dombravuschs

Linard Mayer vain elet sco dombravuschs.

Approvar il protocol da la radunanza generala dals 9 marz 2016

Il protocol da la radunanza generala dals 9 marz 2016 vain preelet ed approvà.

Approvar il rapport da gestiun

Il president Jachen Erni dà ün sguard inavo sül on da gestiun: El manzuna in seis rapport ils puncts culminants dal on 2016, ils cuors da duonnas e quels dals paurs e las sezzüdas da suprastanza. El declera cha la situaziun finanziala da nossa società s’haja stabilisada, ingrazia a tuots pel sustegn e manzuna, ch’el as sainta privilegià da das-chair star avant ad üna società chi saja activa fingià daspö 60 ons ed haja üna grond’importanza per nossa regiun. (Il rapport es acclus a quist protocol). Il rapport vain approvà unanimamaing.

Rendaquint 2016, rapport revisurat

Nos president preschainta il rendaquint 2016. Las entradas s’amuntan a CHF 115’028.95 (budget CHF 66’380.-). Inclus in quel import es ün’entrada extraordinaria da CHF 43’639.20 tras legats chi sun gnits scholts (Legat Hänz e Pinösch – minchün cun CHF 10’000.-). Quists legats nu vaivan ingünas cundiziuns a reguard l’adöver da quels. Il legat Bass vaiva la cundiziun da finanziar ils viadis dals partizipants da la Val Müstair chi frequaintan nos cuors. Da quist legat es gni amortisà ün import da CHF 23’639.20.- pels ons passats.

Las expensas s’amuntan a CHF 74’182.35 (budget 72’126.-) Quatras resulta ün guadogn da CHF 40’846.60. Las activas s’amuntan a CHF 465’485.84 ed il chapital agen a CHF 321’145.64. Üna persuna preschainta dumonda, schi darà alch ledscha chantunala o federala a reguard ils legats in quala füss reglà fin cura ch’üna società stò avair amortisà quels raps. Ingün dals preschaints nu sà d’üna tala ledscha. Ils revisurs da quint, Armon Bezzola e Fadri Häfner, han revis il rendaquint e la contabiltà 2016 ed han chattà tuot in fich bun uorden. Ils revisurs da quint racumondan d’approvar il quint annual e’l bilantsch per l’on da gestiun 2016. Il quint annual e’l bilantsch vegnan approvats da la radunanza unanimamaing e quatras eir dat dis-charch als organs respunsabels.

Approvar il preventiv 2017

Jachen Erni preschainta il preventiv 2017 chi prevezza pro entradas da CHF 69’030.- ed expensas da CHF 72’456.- ün deficit da CHF 3’426.-. Il preventiv vain approvà da la radunanza unanimamaing.

Fixar las contribuziuns da las commembranzas 2018

La radunanza decida unanimamaing da laschar la contribuziun annuala sco fin qua : Commembers singuls pajan CHF 30.-, conjugals CHF 50.- e persunas giuridicas CHF 60.-.

Propostas inoltradas da commembras o commembers (art. 14, alinea 4 dals tschantamaints)

Propostas tenor artichel 14 nu sun entradas ingünas.

Varia

Nos commember d’onur Rico Parli ingrazia al president, a la suprastanza ed al cussagl per la perseveranza da cuntinuar cul andamaint da la Fliana. Nos president ingrazia ad Anna Margaritta e Plasch Filli per lur ingaschamaint dürand l’ultim on ed a tuot las persunas chi hajan sustgnü ad el e chi s’ingaschan a favur da nossa società. Inavant ingrazia el als preschaints per la cumparsa e das-cha serrar la sezzüda a las uras 21:35 h.

In buna fai, l’actuara, Bos-cha, 16 marz 2017, Annapatrizia Richert-Claglüna